තුංග තුරු හිස් නොමැති ගාලුපාර කෙළවර
නිල් සේද සළු ඇදි නිවුන් සෝයුරියන් විලස
අහස මූදත් එක්ක රසැති රහසක් කොඳුරන
ආදරේ අත් පැටලෙනම තැනකි බම්බලපිටිය
එකා පසුපස එකා සෙමින් ඔරවාන සද්දෙන්
යනෙන රිය පෙරහැරත් රතුපාට ළඟදි සන්සුන්
ලුණු හුළං අහුරකට දුවන කෙහෙරැළි උස්සන්
හැඩැති යව්වනියන් දුවයි හවසට ගස්සන්
සුදුපාට පෙණ පිපෙන බීර වීදුරු මත්තට
හැගුම්පොදි දියකරන් මැජෙක්සිටියේ හවසට
දුවන පඩිපෙළ උඩදි මගහැරෙන අත හොයන ඇසකට
ආදරේ තතු කියන සුරපුරකි බම්බලපිටිය
සරස්වතියෙන් හමන උණුම උණු තෝසෙ රස සුවඳට
සීය එකසිය එකත් පහුකරන් ගාටමින් හවසට
ලෝකයම අමතකව පුළුල් උරහිසකට තුරුලුව
ඉන්න පෙම්වතුන් පිරි සුරපුරකි බම්බලපිටිය
Leave a Reply
Your email address will not be published. Required fields are marked (required)