ලා රෝස මල් පොකුරු විලි බරව බිම බලන
සුවඳ සුළඟක එතී නිහඬ ගීයක් ගයන
මාවතකි අප දිහා පුදුමයෙන් මෙන් බලන
කොහේ ගියෙදැයි කියා අසනවා අප දෙදෙන
ආදරේ පුරවාපු තරු ඇහිඳගත් අහස
ඉඳ හිටලා ගැනපු තරු පොළවටම විසි කෙරුව
බිම වැටුණු තරු ඇහිඳගෙන ගෙදර ගෙනියන්න
එන්නේ නැද්දැයි කියා අහනවා අප දෙදෙන
නම නොදන්නා මහා ගස් වලින් සෙවන වුණ
තාර පාරක ඈත කොනක ඇති අවන්හල
පාලු මේසයක් උඩ කෝපි වීදුරු පිරෙන
නොහඳුන බව කියන්නේ කිමද අප දෙදෙන
ඒ අපම බව හැඟෙන තවත් දෙදෙනෙක් සිටින
ඒ අපම දැයි කියා දැන නොදැන මගහැරෙන
එහෙත් පෙර පුරුදු ලෙස පුරුද්දට සිනා සී
අද නතර වී සිටිමු නොහඳුනන ලෙස මෙතැන
Leave a Reply
Your email address will not be published. Required fields are marked (required)