යුද්ධය!! පරාක්‍රම කුරුප්පු.

කඳුළු පිරි උද්දාම සිනා රැලි මුව උදුල
අබිමනින් ලය පිරූ පියවරුන් මුව කමල
ශෝකයෙන් වලප්නා මවුනගේ නෙත කඳුල
යුවතියක වියෝගී සුසුම් රැල්ලක සිහිල
කෙරෙන් සමු ගෙන තුටින
වැයෙන තුරු ගොස මැදින
කරින් බර අවි දරා
අබිමනින් සිත් පුරා
සොල්දාදුවෝ ගියෝ කුරිරු යුද බිම් කරා

හිරු ද බැස යයි අවර
රතින් පැහැ වේ අඹර
හාත්පස පිරි අඳුර
සොයයි ඊළඟ ගොදුර

ලේ මසට ඉව කරන කැනහිල්ය
දෙපා යට පුපුරනා මරුවැල්ය
ගම් නියම්ගම් දනව් දවා ලූ ගිනි දැල්ය
නුවර මැද යුද අගල් පෙළවල්ය

සිහිනයද පුපුරවන අධි බලැති විනාශය
පුපුරා හැලී හිස් මත
විසිරුණු සිහින බිම අතුරා
නිදති හිරිමල් දරුවෝ සිහින නොදකින නින්දක

විසිරුණු ඒ සිහින හැම
අංක ලෙස කේතිතව
පුරවයි ලෙජර් පිටු
බැංකු ගිණුම් කිහිපයක…