ඉරත් ඔරවන හවසක
ඉරට පිච්චුන නගරෙක
සියක් බැල්මන් මඟ හැර
එකම දෑසක් සොයනෙමී
හෝන් සද්දෙට ගැස්සෙන
රක්ත එළියට ඔරවන
ලද ඉසිඹුවට දිව යන
කලබලම පා දකිනෙමී
ඔරලෝසුවට එබෙමින
මූණු අැද කර රවමින
කටු වලට ගතු කියමින
දුවන මිනිසුන් දකිනෙමී
පරක්කුව ගැන ගොරවන
අා සැනින් දොස් පුරවන
පෙම්වතුන්ගේ මුහුණත
සිනා රැල්ලක් සොයනෙමී
ගොදුරු ලොබ පිරි දෑසින
පිරිමි ගොදුරක් එළවන
බාල පව්ඩර් තැවරුණ
මුහුණු වල හැඩ සොයනෙමී
වසුරු තැන තැන හෙළමින
කරච්චල් හඬ නඟමින
හැමට ඉහළින් පියඹන
කාක් කරදර ඉවසමී
ඉරත් හැංගෙන හවසක
ඉරට පිච්චුන නගරෙක
සියක් බැල්මන් මඟ අැර
එකම දෑසක් විමසමී
හිනා මල් පෙති අරගෙන
එනතුරා මඟ බලනෙමී.
Leave a Reply
Your email address will not be published. Required fields are marked (required)